لو انت بقالك فترة عندك النشاط التجاري او البيزنس الخاص بيك فاكيد هتكون عارف مدى صعوبة الحصول على عميل واللي غالبا بيكون بعد حملات تسويقية كتيرة بتكلفك قدر كبير من المال والوقت, وانك كمان تقدر تقنعه بالشراء وتحافظ عليه عشان يكون عميل دائم

وبتظهر الصعوبة دى فى أن مراحل اجتذاب عميل جديد كبيرة وطويلة ودة بيكون مرهق ومكلف جدا للشركات الجديدة او الشركات صغيرة ومتوسطة الحجم ، ودة بيكون نتيجة المراحل المتتالية اللى بياخدها العميل عشان يقدر ياخد قرار الشراء زى جمع المعلومات عن البدائل – تقييم البدائل – اتخاذ قرار الشراء – تقييم ما بعد الشراء .

بالتالى أكبر رصيد في شركتك هما العملاء الدائمين والمنتظمين في الشراء منك واحسن حاجة ممكن تزود ربحك انك مش بس تهتم بالحصول على عملاء جديدة ولكن تهتم بردوا بتحسين خدمة ما بعد البيع والتواصل مع العملاء الدائمين ومع الوقت قاعدة العملاء هتكبر وبالتالي تحقيق زيادة في الربح، والقاعدة المعروفة فى البيزنس أن العملاء الحاليين بيمثلوا 80% من نسبة ربحك فى حين أن العملاء الجدد بيمثلوا فقط 20% من نسبة الربح الخاص البيزنس بتاعك، ومع العلم ان تكلفة الحصول على عميل جديد قد تصل الى 3 اضعاف تكلفة اعادة شراء عميل قديم لشركتك.

في مقال النهاردة هنقولك على سبع طرق مختلفة تساعدك في الحصول على العملاء الجدد و الحفاظ على العملاء الحاليين للشركة:-

فهم سلوك العملاء

قبل ما تبدأ في حملاتك التسويقية لازم تكون فاهم سلوك واهتمامات عملائك المحتملين وده هيساعدك اكتر في معرفة أماكن عرض منتجك وسرعة الوصول للعملاء والخطوة دى بتطلب بيانات صحيحة عن السوق وعملائك وسلوك عملائك عشان تقدر تعمل خطة تسويقية واقعية، و النوعية دى من البينات بتقدر تحصل عليها من خلال برامج كتير مهمة فى عالم البيزنس زى برنامج إدارة علاقات العملاء CRM واللى بدوره بيقوم بتسجيل كل البيانات الخاصة بالعملاء وكمان كل تفاعلات العملاء مع السوق ومع سلعتك او الخدمة اللى انت بتقدمها وهنا تقدر تسحب منة تقارير تفصيلية عن سلوك عملائك.

تجربة العملاء لمنتجك

قبل ما تبدأ بيع منتجك في السوق ممكن تعمل حملة تسويقية وتكون لفترة محددة تسمح لعملائك بتجربة المنتج وتسمع تعليقاتهم الايجابية والسلبية عليه وتحاول تطور من التعليق السلبي لو في إجماع من عدد كبير والطريقة ده من افضل الطرق اللي ممكن تبني بيها علاقة ثقة مع العملاء وهتساعدك في الحصول على عملاء أكتر لأن الناس بتثق في تجربتهم الشخصية أو تجربة معارفهم اكتر من الاعلانات والدعاية، ومثال على ده بتقوم بيه اكبر الشركات فى أنهم فى حالة تجربة منتج جديد بيبدأ بنشرة فى أماكن ساحلية أو قرى واللى من خلالها يقدر يقيس مدى نجاح المنتج دة وفى حالة فشل المنتج فبيكون غير مؤثر نتيجة أن تجربته كانت فى نطاق صغير.

التفاعل مع العملاء

التواصل والتفاعل الدائم مع العملاء ومش شرط يكون بالمكالمات ممكن يكون عن طريق رسائل البريد الالكتروني او السوشيال ميديا او الموقع الخاص بشركتك وتكون بتقدم عليه كل الخدمات والمنتجات الجديدة وتقدر العملاء من خلاله تعرف كل جديد عن الشركة وده بيكون ليه تاثير على المدى البعيد وممكن تستخدم برامج ادارة علاقات العملاء CRM لمساعدتك على التواصل مع العملاء وتسجيل بياناتهم وجميع التفاعلات اللي بتحصل معاهم، ومن المتعارف علية ان العلاقة بين المنتج والعميل لازم تكون two way communication  بمعنى أن الشركة تقدر توصل رسالتها للعميل والعكس كمان ان العميل يقدر يوصل رأيه للشركة.

الاشخاص الاكثر تأثيرا على السوشيال ميديا

من انواع التسويق اللي ظهرت في الفترة الاخيرة هو الاستعانة بالأشخاص الأكثر تاثير ومتابعة على قنوات السوشيال ميديا في الدعاية والإعلان للشركات او المنتجات الجديدة وده طريقة فعالة جدا خاصة لو مجال البيزنس بتاعك بيستهدف أفراد ليهم نفس صفات المتابعين لمشاهير السوشيال ميديا، واللى بيخلى العميل يثق فى رأى الأشخاص المشابهين لية واللى بيتابعهم ودى هتبقى نقطة القوى فى النوع دة من الدعاية.

المنتج كحل لمشكلة العميل

اكتر حاجة بيكون محتاجها العميل هو منتج يحل مشكلة عنده أو بيساعده في حلها يعني افضل المنتجات هي المنتجات اللي بيكون ليها قيمة حقيقة بتتقدم للعميل ومن الذكاء انك تفكر ازاي منتجك يكون جزء أساسي من احتياجات الناس مش مجرد منتج مؤقت ممكن مع الوقت يتم الاستغناء عنه بسهولة.

العملاء المميزون

الميزة اللي بتكون موجودة عند الشركات الصغيرة أن قاعدة العملاء بتكون مش كبيرة وبالتالي الموظفين بيكونوا على معرفة بالعملاء بشكل شخصي وده حاجة بتوصل للعميل مدى اهميته بالنسبة للشركة وشعوره انه عميل مميز وده شئ بيدعم من فكرة ولاء العملاء للشركة و انهم يكونوا عملاء دائمين أو دائمين التعامل مع الشركة.

خدمة ما بعد البيع

لازم تكون مهتم جدا بخدمة ما بعد البيع لأنها من أكثر العوامل التي تساعد على بناء علاقات طويلة الأجل مع العملاء واللي بتساعد بشكل كبير ان منتجاتك تكون هي الافضل لأن العميل دايما بيفكر قبل ما يشتري المنتج في خدمة الصيانة او خدمة العملاء لما يحصل مشكلة في المنتج أو الخدمة يقدروا بسهولة يلاقوا الشركة بتساعدهم في حل المشكلة.